Россиядә эри торган кофега яңа ГОСТ кабул ителәчәк

2026 елның ноябреннән Россиядә эри торган кофега яңа дәүләт стандарты — ГОСТ — гамәлгә керәчәк. Әлеге документ продуктка куелган таләпләрне яңарта һәм аның төрләрен киңәйтә.

Хәзерге ГОСТ 1994 елдан бирле кулланыла. Анда эри торган кофе порошоксыман субстанция буларак кына билгеләнгән. Яңа редакция нигезендә, эри торган кофе порошоксыман гына түгел, гранулалы һәм сублимацияле (корытып туңдырылган) формада да булырга мөмкин.

Яңартылган стандартта җитештерүдә кулланыла торган ингредиентларның төгәл исемлеге күрсәтелми. Документта бары тик үсемлек продуктлары һәм төрле азык компонентлары кулланылырга мөмкин дип кенә әйтелә. Алдагы версиядә исә конкрет ингредиентлар исемлеге булган, алар арасында цикорий һәм арыш та бар иде.

Моннан тыш, яңа ГОСТ порошоксыман кофеда тыгыз ятмаган вак төерләр булуга рөхсәт бирә. Әмма алар аз гына механик йогынтыдан соң җиңел таралырга тиеш. Элеккеге стандарт буенча төерләр булу бөтенләй рөхсәт ителми иде.

Кофеның эрү вакытына таләпләр үзгәрешсез кала: ул кайнар суда 30 секунд эчендә, салкын суда өч минут эчендә эрергә тиеш. Шул ук вакытта гранулалы кофе өчен аерым пункт кертелә: берәм-берәм кызган өлешләре булган очракта, ул ике ярым минут эчендә эрергә мөмкин.

Белгечләр билгеләп үткәнчә, яңа ГОСТ рекомендация характерында булачак, ягъни аны куллану мәҗбүри түгел.

Яңартылган стандарт базардагы продукцияне төрләндерүгә һәм җитештерүчеләр өчен шартларны йомшартуга юнәлтелгән дип фаразлана.